吳先生
肉檔檔主
元朗
0600-1800 (12 hours) 

「我從80年代就開始做豬肉檔，做咗四十幾年，而家我都60幾歲了。我一直住喺元朗，從來無搬過地方，當時做肉檔無乜競爭對手。呢份工一啲都唔易做㗎，揸咗咁多年刀，我成隻右手生滿老繭，可以話係『職業病』。嚟我檔口買嘢嗰啲都係熟客，後生仔女比較少嚟傳統街市，反而佢哋鍾意去超市買肉，一盒盒裝好晒，明買明賣。」

「豬肉檔嘅工作唔算太辛苦，但一啲都唔簡單。為咗養家，我每日都要做十二個鐘頭。我二十幾歲就開始做豬肉佬。我每日都要好早起身，簽收從屠場運過嚟嘅豬肉，將豬肉切割成唔同部位，然後再將分切好嘅豬肉掛喺舖面，等客人知道我哋有邊款肉賣。啱啱開始切豬肉嗰陣好唔順手，但熟能生巧，我好快就學識了。通常老人家係我哋第一批顧客，佢哋朝早七點就會到肉檔，等到舖頭開門嗰陣就買到最新鮮嘅豬肉。鋪頭無咁忙嗰陣，我會將豬肉擺放整齊，保持檔口企理。如果當日有賣剩嘅肉，我會以低價賣畀附近嘅餐廳，我唔會浪費一錢肉。」

「如果你問我最鐘意嘅豬肉部位係乜，我會話瘦肉、五花腩、排骨、梅頭都好正。最重要嘅係你點樣烹煮啲肉。可惜，而家啲後生對呢啲部位已經叫唔出名，佢哋習慣去超市買肉，因為現代人貪求方便，佢哋已經唔識得分辨邊舊肉靚啲、邊舊肉差啲。我依然覺得傳統豬肉檔比超市好，因為喺肉檔，街坊鄰里可以閒話家常，又周不時會講下價，人情味好濃。傳統街市可以凝聚成個社區，過嚟幫襯嘅唔單止係客人，更多嘅係街坊守望相助嗰份情誼。我擔心肉販呢行逐漸式微，未來仲有機會消失。」