朱
雜貨店老闆
天水圍 
07:00-19:00

「我已經喺呢間雜貨店做咗好耐。細個嗰陣，屋企人喺沙田有間舖，嗰陣時我已經有喺舖頭幫手。之後搬咗舖，喺天水圍呢度重新開業。呢間舖已經傳咗三代人，由阿爺傳畀阿爸再傳畀我。做雜貨舖其實好忙，除咗過年嗰幾日可以休息之外，一年365日都要做嘢。雖然工作忙碌，由朝早七點做到夜晚七點，不過我幾鍾意呢份工，主要因為唔會有太大壓力。」 

「我之前係做電工嘅，比起而家，以前嘅生活比較安逸，但係畀人剋扣人工之後，我就無繼續做喇，於是翻嚟繼承呢間鋪。而家呢份工都算係幾悠閒嘅，大部分時間都係看住鋪頭，得閒就同啲街坊、隔離檔主傾吓計。但係如果你話做電工仲難過做呢行就一定係假嘅，做電工始終搵到多啲錢，但相對嚟講以前返工好忙，無乜時間消遣娛樂。反而我做雜貨舖喺生活上唔會咁頻撲，又少啲壓力，所以就一路做到而家。」

我覺得雜貨舖呢行就一定唔會末落嘅，畢竟人點都係要食飯㗎嘛。但係雜貨舖近來嘅生意的確係差咗，因為而家啲後生仔唔會落嚟買餸，我主要來往嘅都係以前嘅熟客。疫情嗰陣，我都少咗好多生意，賺嘅錢差唔多少咗一半，只係勉強開到飯。最近經濟好返少少，鋪頭嘅生意都變好咗，賺返多啲錢，我已經好滿足！」